IMO dənizçilikdə emissiyaların azaldılması və okeanların mühafizəsi üzrə yeni qərarlar qəbul edib
Beynəlxalq Dənizçilik Təşkilatının (IMO) Londonda keçirilən 84-cü sessiyası gəmiçilik sektorunda "xalis sıfır" emissiya hədəfinə nail olmaq və dəniz mühitini qorumaq üçün mühüm strateji qərarlarla yekunlaşıb.
"Seanews.az" xəbər verir ki, iclasda əsas nəticə kimi, Şimal-Şərqi Atlantika rəsmən "Emissiyaya Nəzarət Zonası" (ECA) elan edilib. Bu qərar 2027-ci ildən etibarən gəmilərin kükürd tərkibi 0,10%-dən çox olmayan təmiz yanacaqdan istifadəsini məcburi edəcək. Eyni zamanda Komitə Hörmüz boğazında kommersiya gəmilərinə edilən hücumları pisləyən qətnamə qəbul edərək bu insidentlərin genişmiqyaslı ekoloji fəlakətlərə və kimyəvi çirklənməyə yol açacağı barədə ciddi xəbərdarlıq edib.
Sessiya çərçivəsində 2030-cu ilə qədər gəmilərdən dənizə plastik tullantıların atılmasını tamamilə dayandırmağı hədəfləyən "2026-cı il Strategiyası" təsdiqlənib, həmçinin dəniz canlılarına mənfi təsir göstərən sualtı səs-küyün azaldılması üzrə işlərin müddəti 2028-ci ilə qədər uzadılıb.
IMO-nun Baş katibi Arsenio Dominquez bildirib ki, qlobal gəmiçilik emissiyaları ilə bağlı konsensus bərpa olunub və növbəti mərhələdə yanacaq mənşəyinin şəffaf izlənməsi üçün yeni nəzarət mexanizmləri tətbiq ediləcək. Müzakirələrin həlledici hissəsinin bu ilin noyabrında keçiriləcək 85-ci sessiyada davam etdirilməsi planlaşdırılır.
