ABŞ: İran istiqamətində hərəkət edən tanker raketlə sıradan çıxarıldı
ABŞ Mərkəzi Komandanlığı (CENTCOM) İranla əlaqəli daha bir neft tankerini Hörmüz boğazı yaxınlığında hərəkətsiz vəziyyətə saldığını açıqlayıb. Beləliklə, ABŞ qüvvələrinin son günlərdə dayandırdığı İranla əlaqəli gəmilərin sayı altıya çatıb.
“Seanews.az” bu barədə xarici mediaya istinadla xəbər verir.
Məlumata görə, bayraqsız fəaliyyət göstərən “Lexie” tankeri İranın əsas neft ixrac terminallarından biri olan Xark adasına doğru hərəkət edirdi. CENTCOM gəminin heyətinə 24 saat ərzində dəfələrlə dayanmaq əmri versə də, xəbərdarlıqlara əməl olunmayıb. Nəticədə ABŞ-a məxsus təyyarə tankerin mühərrik bölməsinə kiçik “Hellfire” idarəolunan raketi ataraq gəmini sıradan çıxarıb.
2001-ci ildə inşa edilmiş və 300 min ton yükdaşıma qabiliyyətinə malik olan tanker ABŞ tərəfindən İran neft ticarətində iştirakına görə sanksiya siyahısına salınıb. Gəminin AIS izləmə məlumatlarına görə, son üç ay ərzində o, əsasən transponderini söndürərək fəaliyyət göstərib.
