IMO Somali quldurlarının girov saxladığı 44 dənizçinin azad edilməsinə çağırıb
Beynəlxalq Dəniz Təşkilatının (IMO) Baş katibi Arsenio Dominqes Somali sahillərində dəniz quldurları və silahlı şəxslər tərəfindən girov saxlanılan 44 dənizçinin təcili şəkildə azad edilməsi üçün beynəlxalq ictimaiyyətə çağırış edib.
“Seanews.az” xəbər verir ki, dənizçilər aprel–may aylarında Somali sahilləri və Ədən körfəzində ələ keçirilən “MT Honour 25”, “Eureka” və “Sward” gəmilərində saxlanılırlar. Təşkilatın məlumatına görə, girovlar qida və içməli su çatışmazlığı ilə üzləşib, eyni zamanda davamlı zorakılıq təhlükəsi altında yaşayırlar.
IMO-nun Baş katibi bildirib ki, son hadisələr dəniz quldurluğu və silahlı basqınların hələ də ciddi təhlükə olaraq qaldığını göstərir. O, gəmi sahiblərini və operatorları regiondan keçid zamanı Dəniz Təhlükəsizliyi üzrə Ən Yaxşı İdarəetmə Təcrübələri (Best Management Practices – BMP) sənədinin tələblərinə əməl etməyə və marşrutdan əvvəl hərtərəfli risk qiymətləndirilməsi aparmağa çağırıb.
Təşkilatın məlumatına görə, son üç ay ərzində Qırmızı dəniz və Ədən körfəzində gəmilərə qarşı 24 quldurluq və silahlı basqın cəhdi və ya hadisəsi qeydə alınıb. Qlobal miqyasda isə bu cür insidentlərin sayı 2024-cü illə müqayisədə 2025-ci ildə 17 faiz artaraq 146-dan 171-ə yüksəlib.
