Myanmar sahillərində iki qayıq çevrilib, 500-dən çox rohincanın öldüyü ehtimal edilir
BMT Myanmar sahillərində rohinca qaçqınlarını daşıyan iki qayığın çevrilməsi nəticəsində 500-dən çox insanın həlak olmuş ola biləcəyi barədə xəbərdarlıq edib.
“Seanews.az” xəbər verir ki, BMT-nin Qaçqınlar üzrə Ali Komissarlığı (UNHCR) və Beynəlxalq Miqrasiya Təşkilatının (IOM) birgə bəyanatına görə, qayıqlar iyunun sonunda Myanmarın Rakxayn ştatından yola düşüb. Onların göyərtəsində əsasən Myanmardakı münaqişə və təqiblərdən qaçan rohincalar, eləcə də Banqladeşin Koks-Bazar bölgəsindəki qaçqın düşərgələrindən çıxan insanlar olub.
İlkin məlumata əsasən, təxminən 250 nəfərin olduğu ilk qayıqla yola düşdükdən az sonra əlaqə kəsilib. Təxminən 280 sərnişin daşıyan ikinci qayığın isə iyulun 8-də Myanmarın Ayeyarvadi bölgəsi sahillərində batdığı ehtimal olunur. Hadisə ilə bağlı araşdırmalar davam etsə də, 500-dən çox insanın həyatını itirdiyi güman edilir.
BMT qurumları musson mövsümündə Benqal körfəzi və Andaman dənizində kiçik taxta qayıqlarla səyahətin son dərəcə təhlükəli olduğunu vurğulayaraq, axtarış-xilasetmə əməliyyatlarının gücləndirilməsinə və insan alveri ilə mübarizədə regional əməkdaşlığın artırılmasına çağırıb.
