“Samsung Heavy Industries” şirkəti 3,1 milyard dollarlıq gəmi tikintisi müqaviləsi bağlayıb
Cənubi Koreyanın “Samsung Heavy Industries” gəmiqayırma şirkəti Asiya daşıyıcısından öz tarixində ən böyük sifariş alıb.
“Yonhap” xəbər agentliyinin məlumatına görə, 16 konteyner gəmisinin tikintisi üçün müqavilənin dəyəri 3,1 milyard dollardır.
İki yanacaqlı mühərrikləri olan konteyner gəmilərinin tutumu 16 000 TEU olacaq. Gəmilər metanoldan yanacaq kimi istifadə edə biləcək. Gəmilərin təhvil verilməsi mərhələli şəkildə həyata keçiriləcək və sonuncu konteynerdaşıyan 2027-ci ilin dekabrında təhvil veriləcək.
Şirkət bundan əvvəl ən böyük gəmi tikintisi müqaviləsini 2022-ci ilin iyununda imzalamışdı:o zaman “Samsung Heavy Industries” 12 dəniz qaz daşıyıcısı sifariş etmişdi.
Ümumilikdə, “SHI” 2023-cü ildə 6,3 milyard dollar dəyərində müqavilələr imzalayıb ki, bu da cari il üçün nəzərdə tutulan 9,5 milyard dollarlıq gəmiqayırma portfelinin 66%-ni təşkil edir. Şirkət altı LNG tankeri, iki neft tankeri, 16 konteyner gəmisi və LNG saxlama-boşaltma sistemi də daxil olmaqla 25 gəmi inşa edəcək.
1974-cü ildə əsası qoyulan “Samsung Heavy Industries” (baş ofisi Seulda yerləşir) dünyanın ən böyük gəmiqayırma şirkətlərindən biridir. Cənubi Koreyanın ən böyük holdinqi olan “Samsung Group”-a daxildir. Şirkət müxtəlif növ gəmilərin, portal və üzən kranların, gəmilər üçün rəqəmsal avadanlıqların istehsalı ilə məşğul olur və müştərilərinə müxtəlif tikinti və mühəndislik həlləri təklif edir.
