Dünyanın ilk yelkənli “Ro-Ro” raket daşıyıcısı istismara verilib
“Canopée” adlı dünyanın ilk yelkənli “ro-ro” raket daşıyıcısı istismara verilib. Gəmi sifarişçinin – Fransanın “ArianeGroup” aerokosmik şirkətinin maraqları naminə işə başlamağa hazırdır.
“Seanews.az” xəbər verir ki, unikal gəmi “Ariane 6” raket daşıyıcının komponentlərini Avropadan Fransa Qvianasına daşımaq üçün nəzərdə tutulub. Fransa bayrağı altında üzəcək gəmi Polşadakı “Neptun” Gəmiqayırma Zavodunda “Jifmar” və “Zéphyr & Borée” şirkətlərinin birgə müəssisəsi olan “Alizes” tərəfindən inşa edilib.
Gəminin uzunluğu 121 metr, eni 23 metrdir. Arxa tərəfdəki göyərtə açıqdır və yükün təhlükəsizliyini təmin etmək üçün hündür məhəccərlərə malikdir.
Hibrid hərəkət sisteminə “Ayro” tərəfindən hazırlanmış dörd sərt “Oceanwing” yelkənləri daxildir. Qatlanan yelkənlərin hündürlüyü 30 metr, ümumi səthi 1452 kvadratmetrdir. Əsas güc qurğularına əlavə olaraq yelkənlərin istifadəsi bunker istehlakını və atmosfer emissiyalarını 15% -dən 40% -ə qədər azalda bilər.
“Canopée”-nin kosmos proqramı komponentlərin tədarükü üçün “ArianeGroup” ilə 15 illik müqavilə çərçivəsində ildə 12-yə qədər səfər həyata keçirəcəyi gözlənilir.
