Çinin 3 tankeri Hörmüz boğazından geri dönüb
Hörmüz boğazında gəmiçilik üçün risklərin yüksək olaraq qalması fonunda Çinlə əlaqəli üç supertanker istiqamətini dəyişərək geri dönüb. Gəmilərin niyə qəfil geri döndüyü məlum deyil.
“Seanews.az” xəbər verir ki, İraq nefti ilə yüklənmiş “Sea V” tankeri çərşənbə axşamı Fars körfəzindən Hörmüz boğazına doğru hərəkət edərkən geri dönüb və hazırda boğazın girişində gözləyir. “Hestia” tankeri isə Oman sahili boyunca körfəzə daxil olduqdan sonra istiqamətini dəyişərək geri çıxıb. İraqa doğru hərəkət edən “Erecter” tankeri də geri dönüb. Hər üç gəmi Honq-Konq bayrağı altında üzür və göyərtəsində Çin heyətinin olduğu bildirilir.
Bununla belə, bəzi gəmilərin boğazdan hər iki istiqamətdə keçidi davam etdirdiyi görünür. “Sweden Prosperity” və “Singapore Prosperity” adlı Liberiya bayraqlı VLCC-lərin siqnallarını söndürərək Hörmüz boğazından keçdiyi ehtimal olunur.
