Norveç Rusiyanın tədqiqat gəmisini Ukraynanın tələbi ilə saxlayıb
Norveçin Svalbard qubernatoru məhkəmə qərarı əsasında sentyabrın 2-də Rusiyanın tədqiqat gəmisindən kruiz gəmisinə çevrilmiş “Professor Molchanov” gəmisinə nəzarətin ələ keçirildiyini açıqlayıb.
“Seanews.az” bu barədə xarici mediaya istinadla xəbər verir.
Məlumata görə, gəmi Ukraynanın dövlət şirkəti “Naftogaz”ın Rusiyadan Krımın 2014-cü ildə ilhaqı zamanı itirdiyi aktivlərə görə təzminat tələbi çərçivəsində saxlanılıb. 2023-cü ildə Haaqa tribunalı Rusiyanın “Naftogaz”a təxminən 4,22 milyard dollar, həmçinin faiz və məhkəmə xərcləri ödəməsinə qərar verib.
Avqustun 31-də Norveçin Nord-Troms Dairə Məhkəməsi “Naftogaz”ın gəminin tutulması ilə bağlı tələbini təmin edib. Sentyabrın 2-də gəmi Svalbardın Barentsburq limanına yönləndirilib.
1982-ci ildə Finlandiyada Rusiya üçün hidroqrafik və okeanoqrafik tədqiqat gəmisi kimi inşa edilən “Professor Molchanov” 72 metr uzunluğundadır, Rusiya bayrağı altında üzür və 54 sərnişin üçün nəzərdə tutulub. Gəmi 2025-ci ilin iyunundan Murmanskdan Svalbard istiqamətində ekspedisiya səfərləri həyata keçirir.
Bu, Ukraynanın Avropa məhkəmələrində Rusiyanın aktivlərinə qarşı son uğurudur. Avqustun əvvəlində İsveç Ali Məhkəməsi Krımdan oğurlanmış taxıl daşıdığı iddia edilən “Caffa” yük gəmisinin Ukraynaya verilməsinə imkan yaradan qərarı qüvvədə saxlayıb.
